Pehlivan Kara Ahmed'in Vefatı/İrtihal Havadisleri 12.

Künye: Servet-i Fünun, Pehlivan Kara Ahmed'in Vefatı, C. 23, S. 579, 29 Mayıs 1902 /16 Mayıs 1318, ss. 61-62. 

    Kara Ahmed, 1287 [1870-71] tarihinde Hezargrad kazasında bir karyede tevellüt etmiştir. Küçüklüğünde pehlivanlığa heves ederek arkadaşları içinde oldukça temayüz ettikten sonra henüz yirmi bir yaşında bir babayiğit iken İstanbul'a gelmiştir.

Üç buçuk seneyi mütecaviz bir müddet şehrimizde kaldıktan ve bu müddet içinde meşhur pehlivanlarımızdan Hergeleci'den telemmüz ettikten sonra Avrupa'ya açılan meydan-ı müsaraaya koşmuş ve hiçbir yerde omuzunu yere getirmeyerek Osmanlıların zor-ı bâzûsunu âleme ilân eylemiştir.

Ahmed bundan sonra üç defa daha Avrupa'ya gitmiş ve sonuncuda Fransa'nın, Almanya'nın, Avusturya'nın muhtelif mahallerinde güreşerek içlerinde meşhur Rus pehlivanı (Hakenşmid[?])da olduğu hâlde otuz yedi pehlivana galebe çaldıktan sonra işbu Mayıs'ın üçüncü günü, cuma günü şehrimize avdet eylemişti. Pazar günü yolda giderken kendinde fenalık hissederek girdiği kahvehanede fücceten [aniden] vefat eylemiştir.

Kara Ahmed, Osmanlı pehlivanlarının da birincilerinden idi. Ahmed'in Bursa'da Mehmed, İsmail, Hasan namında üç biraderi vardır.

Fransız kadınlarından birisi Kara Ahmed'in metanet ve şöhretine meftun olarak kendisini Paris'ten İstanbul'a kadar takip etmiş. Bundan iki sene evvel Ahmed'in daire-i zevciyete girmek üzere kabul-i İslâm eylemiş ve nikâhları icra edilerek Aişe Zarife tesmiye edilmiş idi.

Müteveffa Kara Ahmed pehlivan, gümüş iftihar madalyasıyla taltif buyurulmuştu.

Fransa'da icra eylemiş olduğu müteaddid güreşlerde bir altın ve üç gümüş madalya ve Rusya'da iki altın madalya, Belçika'da iki altın madalya, Almanya'da Münih şehrinde bir gümüş madalya ihraz eylediği gibi Paris'te cihan pehlivanlığı unvanını ihraz eylediği zaman bir de yeşil kurdele ve en son leyldeki güreşte dahi kezalik bir mavi kurdeleye nail olmuştur.